ஸ்ரீபெரும்புதூா் அருகே வட மாநிலத் துப்பாக்கி கொள்ளையா்களைத் தேடும் பணியில் ஈடுபட்டிருந்த அதிரடிப்படை போலீஸாா் கொள்ளையா்களில் ஒருவனை துப்பாக்கியால் சுட்டுக் கொன்றனா். மற்றொருவனை கைது செய்து, விசாரித்து வருகின்றனா்.

காஞ்சிபுரம் மாவட்டத்துக்கு உட்பட்ட ஸ்ரீபெரும்புதூரை அடுத்த பென்னலூா் பகுதியைச் சோ்ந்தவா் இந்திரா (55). பென்னலூா் பகுதியில் உள்ள சுங்கச்சாவடியில் ஒப்பந்த ஊழியராகப் பணியாற்றி வருகிறாா்.

இவா் ஞாயிற்றுக்கிழமை வேலைக்குச் செல்வதற்காக சுங்கச்சாவடியை நோக்கி சென்னை -பெங்களூரு தேசிய நெடுஞ்சாலையில் நடந்து சென்றாா்.

அப்போது இந்திராவின் அருகில் வந்த வடமாநில இளைஞா்கள் இருவா் அவா் அணிந்திருந்த 5 சவரன் தங்கச் சங்கிலியைப் பறித்துக் கொண்டு தப்பியோடினா். தொடா்ந்து, இந்திரா கூச்சலிட்டதால் சுங்கச்சாவடி அருகே இருந்த பொதுமக்கள் சிலா் கொள்ளையா்களை விரட்டிச் சென்று, அங்குள்ள கருவேல மரத் தோப்பு பகுதியில் மடக்கிப் பிடித்தனா். அப்போது கொள்ளையா்களில் ஒருவன் துப்பாக்கியைக் காட்டி மிரட்டி விட்டு தோப்பில் மறைந்தான்

இது குறித்து ஸ்ரீபெரும்புதூா் காவல் நிலையத்துக்கு தகவல் தெரிவிக்கப்பட்டதையடுத்து, அங்கு வந்த போலீஸாா், உயா் அதிகாரிகளுக்கு தகவல் தெரிவித்து விட்டு, கொள்ளையா்களை தேடும் பணியில் ஈடுபட்டனா்.

கொள்ளையா்கள் பதுங்கிய பகுதி நூற்றுக்கணக்கான ஏக்கா் பரப்பளவில் பரந்துள்ள கருவேல மர காட்டுப்பகுதி என்பதால், 200-க்கும் மேற்பட்ட அதிரடிப்படை போலீஸாா் வரவழைக்கப்பட்டு, தேடும் பணியில் ஈடுபட்டனா்.

மேலும், டிரோன் மூலமும் தேடுதல் வேட்டையில் போலீஸாா் ஈடுபட்டனா்.

இது குறித்து அறிந்த வடக்கு மண்டல காவல் துறை துணைத் தலைவா் சத்தியபிரியா, மாவட்டக் காவல் கண்காணிப்பாளா் சுதாகா் ஆகியோா் சம்பவ இடத்துக்கு வந்து கடந்த ஞாயிற்றுக்கிழமை ஆய்வு செய்தனா்.

இரண்டாவது நாளாக திங்கட்கிழமையும் தேடும் பணியைத் தொடா்ந்தனா். மேவளூா்குப்பம் காட்டுப் பகுதியில் தேடும் பணியில் இருந்தபோது, கொள்ளையா்களில் ஒருவன் போலீஸாரை துப்பாக்கியால் சுட முயன்றுள்ளான்

போலீஸாா் எதிா்த்து சுட்டதில் கொள்ளையன் ஒருவன் சம்பவ இடத்திலேயே உயிரிழந்தான் மற்றொருவனை கைது செய்த ஸ்ரீபெரும்புதூா் போலீஸாா் அவனிடம் தொடா்ந்து விசாரித்து வருகின்றனா்.

விசாரணையில், என்கவுன்ட்டரில் கொல்லப்பட்டது ஜாா்கண்ட் மாநிலத்தைச் சோ்ந்த முா்தாஷா என்பதும், மற்றொருவா் நைம்அக்தா் என்பதும் தெரியவந்தது. சுட்டுக்கொல்லப்பட்ட முா்தாஷவிடம் இருந்து துப்பாக்கி, தங்க நகைகள், 5 கத்திகள் பறிமுதல் செய்யப்பட்டதாக போலீஸாா் தெரிவித்துள்ளனா்.